Tíu teymi valin í Startup Reykjavík

Tíu teymi voru valin til að taka þátt í viðskiptahraðlinum Startup Reykjavík sumarið 2015, þetta kemur fram í tilkynningu sem var send út í dag. Teymin voru kynnt á Startup Iceland ráðstefnunni sem fór fram í gær.

Norðurskautið mun á næstu vikum fjalla ítarlega um Startup Reykjavík en teymin sem komust inn í ár eru samkvæmt tilkynningunni:

Wasabi Iceland — Ætla að rækta hágæða wasabi á Íslandi með því að nýta hreint vatn og endurnýjanlega orku.

Kvasir software — Munu nútímavæða borðspil þar sem síminn þinn er stjórntækið og sjónvarpið borðspilið.

Farma — Tengir saman rafræn skilríki og rafræna lyfseðla. Fólk getur keypt lyf á netinu með öruggum hætti og fengið sent heim.

Viking Cars — Vettvangur til þess að deila bílnum sínum með öðrum með öruggum hætti — þetta er eins og Airbnb fyrir bíla.

Spor í sandinn — Munu byggja sjálfbært vistkerfi í hjarta borgarinnar sem býður upp á nýja upplifun í ferðaþjónustu

Genki instruments — Eru að þróa nýstárleg raftónlistarhljóðfæri sem tengja má saman með áður óséðum hætti.

Three42 — Hugbúnaður sem tekur við upplýsingum úr bílnum þínum og tengir beint við snjallsímann.

Delphi — Nýta þekkingu fjöldans til þess að spá fyrir um tiltekna viðburði í framtíðinni.

PuppIT — Þróa tækni til að taka upp myndefni í rauntíma til þess að nýta fyrir kvikmyndir, leiki, leikhús og sýndarveruleika.

Hún / Hann Brugghús — Stefna að því að búa til hágæða bjór úr íslenskum hráefnum.